> ## Content Index
> Fetch the complete content index at: https://www.botantimes.com/llms.txt
> Use this file to discover other available public pages before exploring further.

# ١٩٦٥: د قەیدێن وەزارەتا ناڤخوەیی یا تركیەیێ دە ناڤێ ڕۆبۆزكێ "ڕۆبۆزك" ە
- URL: https://www.botantimes.com/-d9-a1-d9-a9-d9-a6-d9-a5--d8-af--d9-82-db-95-db-8c-d8-af-db-8e-d9-86--d9-88-db-95-d8-b2-d8-a7-d8-b1-db-95-d8-aa-d8-a7--d9-86-d8-a7-da-a4-d8-ae-d9-88-db-95-db-8c-db-8c--db-8c-d8-a7--d8-a/
- Published: 2024-12-28T11:41:04.000Z
- Updated: 2024-12-28T11:41:04.000Z
- Author: Murat Bayram
- Tags: کورمانجی, #Migrated-1779046579484, #wp, #wp-post, #Import 2026-05-17 22:37

ب ئێرشا بالافرێن شەڕی یێن تركیەیێ یا ل سەر گوندێ ڕۆبۆزكێ د ٢٨ێ كانوونا پێشیێ یا ٢٠١١ێ دە، ٣٤ كەس هاتنە كوشتن. ١٧ ژ وان زارۆك بوون. ئەڤ بویەرەكا وەلێ یە كو بەشەك ژ بیرا جڤاكی یا كوردان ە، پارچەیەك ژ تاریخا مە یا دلكول ە.

لێ ناڤێ ڕۆبۆزکێ وه‌ک ڕۆبۆسکی به‌لاڤ بوو.

گەلەك كێم خوەدان-قەلەمێن بۆتی هەنە كو بكارن بەحسا گوند و باژارێن خوە بكن. گەلەك كێم كەسێن خەمێ ژ ڕاستنڤیسینا ناڤ و جهێن مە دخون هەنە. ژ بەر وێ ئەز وەك بەرپرسیاریا خوە دبینم كو هەر جار خەلەتیێن ل سەر ناڤێن مە ڕاست بكم. هەكە ئەم ناڤەكێ خەلەت ل بویەرەكێ بكن ئەم ێ چاوا وێ ب خوە ڕاست بینن بیرا خوە. ژ بەر كو ناسین و هەڤ-ناسین ژ ناڤی دەست پێ دكە.

شائرێ ژ بۆتانێ بەركەن بەرەح د شەیرا خوە یا ل سەر ڕۆبۆزكێ دە هۆلێ گۆتیە:

> *ڕۆبۆزكێ*  
>  
> د شەڤتاریەكێ دە،  
>  
> وەك گەنمێ ل بن جەرجەرەیێ  
>  
> ئەم پەرچقین و بەلاڤ بوون  
>  
> "بێگومان دەولەتێ قەیدێن هەر تشتی گرتنە. لێ ئەو بخوازە ئەم چ ببینن یانی چ كێری وێ بێ وێ نیشانی مە دكە."

![](https://botantimes.com/wp-content/uploads/2024/12/IMG_4653-e1735383134771.jpg)

مالمیسانژی ب ڤان گۆتنان دەست ب پانەلەكا خوە كربوو.

سەرۆككۆمارێ ئیرۆ یێ تركیەیێ، رەجەپ تەییپ ئەردۆغانی ژی گۆتبوو "هەگەر ل كوردستانێ بنێرن دێ ل زابتێن مەجلیسێ ببینن... ل عوسمانیان دێ ببینن ڕۆژهلات و باشوور-ڕۆژهلات ئەیالەتا كوردستانێ یە." [(ئائا، ٢٠١٣](https://www.aa.com.tr/tr/politika/kayitlara-baksalar-kurdistani-meclisin-ilk-zabitlarinda-gorecekler/203334?ref=botantimes.com))

بێگومان ژ بۆ بەرژەوەندیێن خوە دەولەتێ ئاگاهیێن ڕاست ئێن ل سەر مە گوند و باژارێن مە ژی نڤیسینە. ل گۆر [سەرژماریا گشتی یا ١٩٦٥ێ هاتی كرن](https://web.archive.org/web/20200218085143/https://kutuphane.tuik.gov.tr/pdf/0015227.pdf) ل گوندێ ڕۆبۆزكێ ٣٨٥ كەس دژیان.

د قەیدان دە ناڤێن تركی هاتنە نڤیسین و د ناڤ كەڤانەكێ دە ناڤێن كوردی هاتنە نڤیسین.

ژ بەر كو تام د ناڤا گوندی دە ئاڤەك دەرباس دبە ب زمانێ تركی ناڤێ ئۆرتاسو (ئۆرتا: ناڤ، سو: ئاڤ، ئۆرتاسو: ناڤ ئاڤ).

![](https://botantimes.com/wp-content/uploads/2024/12/Robozik.png)

بەلاڤبوونا ڤێ خەلەتیێ ل ئاستەكا بلند ە. ٢٠٢٢یێ ئەز دگەل رۆژنامەگەرەكی و زماناسەكا ژ ئەمەریكایێ هاتی چووم ڕۆبۆزكێ. هن كەسان د ئاخفتنا خوە دە ژی گۆتن "ڕۆبۆسكی" دەما من ئەو سەكناندن و ژ وان پرسی: ما هوون ژی دبێژن ڕۆبۆسكی، وان گۆت نا خەلك وەسا فێم دكن.

هەتا كو ل تابەلایەكا جهێ گۆرستانێ نیشان ددە ژی "ڕۆبۆسكی" هاتیە نڤیسین. ئەڤ هەلوەستەكا خەریب ە كو كەسێن ژ دەرڤە دەما ناڤێ مە خەلەت دبێژن ئەم ژی گۆتنا وان ل سەر یا خوە رە قەبوول دكن.

ئەز ژ "گوندكێ مەلە دەروێشی" مە، پاشێ بوویە "گوندكێ مەلایی" - "گوندكێ مەلی" و پاشێ گوندك. گەلەك ئەجێب ە كو دەما كەسێن سیاسی تێن گوندێ مە دبێژن "گوندكێ مەلێ" و رۆژنامەگەر ژی وەلێ دنڤیسن. لێ ئەڤ تاریخكوژیا ناڤێ مە یە!

**ڕۆ-بۆز-ك چ یە؟**

ڕۆ/ڕۆبار: ئاڤا ژ چەمی بچووكتر ە بۆز: ڕەنگەكێ ل نێڤبەرا سپی و گەوری دە یە ك: پاشگرا بچووككرنێ ئان ژی بناڤكرنێ یە (وەك گرك: گرەكێ بچووك ە، ئەو هەڤیرێ كو مرۆڤ ب دەستەكێ دكارە بگرە گرك ە. گرك ناڤەك ە.)

**ڕۆبۆزكی چ یە؟**

ئەو كەسێن كو ژ ڕۆبۆزكێ نە ڕۆبۆزكی نە. وەك: دهۆكی، جزیری، مێردینی.

**ڕۆبۆزگی چ یە؟**

خەلكێ بۆتانێ ژ بۆ سڤككرنا ئاخفتنێ پرانیا "ك"یێن پاشیێ وەك "گ" دبێژن. خەلكێن گوندكی دبێژن "ئەم گوندگی نە" یێن ڕۆبۆزكێ ژی د ئاخفتنا رۆژانە دە دبێژن "ئەم ڕۆبۆزگی نە"

**ڕۆبۆسكی چ یە؟**

هەر دیسا د سڤك-ئاخفتنا رۆژانە دە، گەلەك جاران "ز" و "س" دكارن جه بگوهەرن. ژ خوە خەلكێن ڕۆبۆزكێ دەما كو دئاخڤن مرۆڤ گەلەك جاران ژ هەرفا "ز"یێ زێدەتر هەرفا "س"یێ دبهیسە. وەك: ئەز ڕۆبۆسكی مە "س"، ئەز ژ گوندێ ڕۆبۆزگێ مە "گ". هەر دیسا هەردو گوهۆرتن ب هەڤ رە ت جاران نایێ گۆتن. یانی ئەو كەسێن دبێژن "ئەز ڕۆبۆسكی مە" هەروەها دبێژن: "ئەز ژ گوندێ ڕۆبۆزگێ مە" نابێژن "ئەز ڕۆبۆسگییێ مە" ئان ژی "ئەز ژ گوندێ ڕۆبۆسگێ مە."