> ## Content Index
> Fetch the complete content index at: https://www.botantimes.com/llms.txt
> Use this file to discover other available public pages before exploring further.

# Iraqê daxuyanîyek da derbarê êrişên li nav axa Herêma Kurdistanê-Iraq
- URL: https://www.botantimes.com/iraqe-daxuyaniyek-da-derbare-erisen-li-nav-axa-herema-kurdistane-iraq/
- Published: 2024-07-11T07:51:14.000Z
- Updated: 2024-07-11T07:51:14.000Z
- Author: Botan Times
- Tags: Nûçe, #Migrated-1779046579484, #wp, #wp-post, #Import 2026-05-17 22:37

Ev demekî dirêj e dewleta Tirkîyeyê li nav axa Herêma Kurdistanê-Iraqê bi hinceta PKKyê êrişan dike.

Di encama van êrişan da [zîyaneka xwezayî û malî](https://www.rudaw.net/kurmanci/kurdistan/1007202412?ref=botantimes.com) jî gihîştîye xelkê Herêma Kurdistanê û xelk neçar maye [gundên xwe terk kirine](https://www.rudaw.net/kurmanci/kurdistan/100720247?ref=botantimes.com).

Di heman demê da duhî bi şev sewkîyat hatîye kirin û wesayîtên zirxî û panzer ji derîyê Serzerê yê Çelê ra [derbasî](https://mezopotamyaajansi.net/kr/HEM-NCE/content/view/247339?ref=botantimes.com) Herêma Kurdistanê bûne.

Li ser van bûyeran Encûmena Asayişa Niştimanî ya Iraqê li ser hebûna Tirkîyeyê ya li Herêma Kurdistanê-Iraqê daxuyanîyek da.

Li gorî nûçeya Rûdawê Encûmena Asayişa Niştimanî ya Iraqê êrişên Tirkîyeyê yên li nav axa Iraq û Herêma Kurdistanê red kir û got, “Divê Tirkîye cîrantîya baş li ber çavan bigire.”

Herwiha Encûmena Asayişa Niştimanî ya Iraqê dê şandeke leşkerî bişîne Herêma Kurdistanê.

Encûmena Asayişa Niştimanî ya Iraqê ku ji hejmarek wezaret û dezgehên ewlehîyê pêk tê, piştî civîna bi serokatîya Serokwezîr û Fermandarê Giştî yê Hêzên Çekdar ên Iraqê Mihemed Şîya Sûdanî civîya derbarê êriş û operasyonên hêzên Tirkîyeyê de, daxuyanîyek belav kir.

Li gorî daxuyanîyê, di civînê da mijarên herî girîng ên ewlehîyê û geşedanên di rojevê da hatin gotûbêjkirin ku di nav wan da “destwerdan û binpêkirinên hêzên Tirkîyeyê yên li navçeyên sînorî yên hevbeş” hebûn.

Di daxuyanîyê da hat ragihandin, “Mijarên herî giring û geşedanên di rojevê da yên derbarê ewlehîyê da hatin gotûbêjkirin. Di derbarê van da biryar û rênîşandanên pêwîst hatin girtin.”

Di daxuyanîyê da hat gotin, "Wan tekezî li ser redkirina hatina hêzên Tirkîyeyê ya nav axa Iraqê kir.

Divê Tirkiye prensîba cîrantîya baş û têkiliyên dîplomatîk bi Hikûmeta Iraqê re bişopîne û di her mijarên ewlehiyê da bi wê re hevahengiyê bike."

Ji bo agahîyên berfirehtir [bitikîne](https://www.rudaw.net/kurmanci/middleeast/iraq/100720242?ref=botantimes.com).