> ## Content Index
> Fetch the complete content index at: https://www.botantimes.com/llms.txt
> Use this file to discover other available public pages before exploring further.

# Kurd û Nexşeya Dinyayê
- URL: https://www.botantimes.com/kurd-u-nexseya-dinyaye/
- Published: 2023-06-24T08:29:05.000Z
- Updated: 2023-06-24T08:29:05.000Z
- Author: Serdar Şengül
- Tags: Nivîskar, Podcast, SERNÛÇE, #Migrated-1779046941970, #wp, #wp-post, #Import 2026-05-17 22:43

Li welatekî ewropayê, li dibistanekê, zarokên ji milletên ciyawaz, di dersa cografyayê de ne. Mamosteya wan ji wan dipirse: “Li ser nexşeya dinyayê cihê welatê xwe nîşan bidin.”

Zarok yek bi yek diçin ber nexşeyê û bi kelecanekê li nexşeyê dinêrin û bi tilîyên xwe welatên xwe nîşan didin.

Keçikeka kurd jî, li pey hevalên xwe tê ber nexşeya dinyayê. Li nexşeyê dinêre û qederekê disekine. Piştre piçekî din nêzî nexşeyê dibe û careka din li her koşeyên nexşeyê dinêre. Paşê bi kefa her du destên xwe rûyê xwe dipêçe, tenê du çavên tijîtirs û vekirî dimînin, ku li nexşeya dinyayê asê mane. Qêrînek jê hildibe, hêstirên çavên wî dibin baran û diniziline ber nexşeyê. Mamosteya wê fêhm dike û tê ber wê da ku wê tesellî bike, destê xwe dide serê wê.

Wisa matmayî li cihê xwe rûdine, bi kesî re xeber nade. Danê êvarê vedigere malê. Li hember dê û bavê xwe disekine û bi girîna kûrekûr gilî û gazindan dike: “Welatê me li ser nexşeya dinyayê tune ye, welatê me li ser nexşeya dinyayê tune ye. Hûn ewqas behsa wê dikin, ka welatê me?!”

Dê û bav, ku bi salan ji bo welatê xwe şer kirine, keça xwe himbêz dikin û didin ber singê xwe.

Bavê wê jê re qala dîroka kurdan û ya dinyayê dike. Cihê welatê xwe di dilê keça xwe de neqş dike û dibêje, “Nexşeya dinyayê şaş e keça min, em ê sererast bikin.”

Ew keçik û bi hezaran mîna wê hê li bendê ne…