> ## Content Index
> Fetch the complete content index at: https://www.botantimes.com/llms.txt
> Use this file to discover other available public pages before exploring further.

# Zextên li ser rojnamegeran di meha Çileyê de zêde bûn - DFG
- URL: https://www.botantimes.com/zexten-li-ser-rojnamegeran-di-meha-cileye-de-zede-bun-dfg/
- Published: 2025-02-03T11:22:14.000Z
- Updated: 2026-05-17T19:22:36.000Z
- Author: Botan Times
- Tags: Nûçe, Rojnamegerî, #Migrated-1779045399267, #wp, #wp-post, #Import 2026-05-17 22:16

Li Tirkiyeyê di meha Çileyê de 18 rojnameger hatine desteser kirin û 9 ji wan hatine girtin. Li gorî Rapora Binpêkirinên Mafan a Komeleya Rojnamegeran a Dîcle Firatê (DFG), derbarê 42 rojnamegeran de lêpirsîn hatiye destpêkirin.

## Girtina rojnamegeran zêde bû

Polîsan di 17ê Çileyê de bi ser şîrketên produksiyonê yên Guncel û Martiyê de girt û di çarçoveya heman lêpirsînê de li bajarên Wan, Mêrsîn û Stenbolê jî operasyon pêk anî. Di encama operasyonê de rojnameger Reyhan Hacioglû, Rahîme Kavrar, Velat Ekîn, Necla Demîr Arvas, Vedat Oruç, Ahmet Guneş û Eylem Babayîgît hatin girtin.

## 102 rojnameger hatin darizandin

Di 43 dosyayan de 102 rojnameger ji ber xebatên xwe yên pîşeyî hatin darizandin. Di encama van darizandinan de ji 12 rojnamegeran re 31 sal û 2 meh cezayê girtîgehê hate dayîn. Midûra Nûçeyan a Jinnewsê ya Berê Sofya Alagaş ji ber dozên têkildarî serdema rojnamegeriyê 6 sal û 3 meh ceza girt.

## Qanûna nû ya sansurê hat pêşkêşkirin

Parlamenterên AKPê Atay Ûslû û Alî Ozkaya û 133 parlamenter di 10ê Çileyê de teklîfa Qanûna Ewlehiyê ya Sîber a nû pêşkêşî Meclisê kir. Teklîf di 15ê Çileyê de li Komîsyona Parastinê ya Meclisê hate qebûlkirin. Qanûn ji kesên nûçeya "parvekirina daneyan" çêdike re ji 2 salan heta 5 salan cezayê girtîgehê dide.

## Hesabên medyaya dîjîtal hatin girtin

Di meha Çileyê de hesaba Ajansa Mezopotamyayê (@MAturkce), hesaba JINNEWSê (@jinnewsturkce) û hesaba rojnameya Yenî Yaşamê (@yeniyasamgazete) di nav de 31 hesabên medyaya dîjîtal hatin girtin. Her wiha xwegihandina 10 malperên înternetê û 361 nûçeyan hate astengkirin.

Çavkanî:

- Komeleya Rojnamegeran a Dîcle Firatê
- Rapora Binpêkirinên Mafan a Meha Çileyê