Botan Internationalê kargehên rojnamegerîya kurdî ya dîjîtal pêk anîn
Sazîya Perwerdeya Rojnamegerîya Kurdî Botan Internationalê li ofisa xwe ya li Dîyarbekirê dersên rojnamegerîya kurdî ya dîjîtal pêşkêş kirin.
Di çarçoveya dersên kargehê da Sertaç Kayar dersa wênegirîyê, Mehdî Mutlu pêşkêşkarîya bernameyan, Hatîce Kamerê çêkirina podcastan û Serdar Canan dersa nefes û dîksîyonê dan.
Wêne, zimanekî nûçebêjîyê ye. Wêneyê ku hewil nede fikrekê pêşkêş bike û eger di paşxaneya hişê rojnamegeran da fikrek tune be nikare wêneyekî baş bigire.
Sertaç Kayar
Ji bo pêşkêşkarîyeka baş divê hûn bi dengê ji dîyaframê biaxivin. Pêşkeşkirin wekî îlûzyonekê ye.
Mehdî Mutlu
Di karê rojnamegerîyê da, tişta herî giring, dîksîyoneka rast û danûstandineka rast ya nefesê ye. Ger hûn behn û nefesa xwe rast û herwiha ji dîyaframê negirin dê dengê we têrî hevokekê neket. Ji ber vê yekê divê hûn her li ser danûstandina nefesê hûr bibin û ji bo dîyaframa xwe pêş bixin rahênan û egzersîzan bikin.
Serdar Canan
Piştî ku te biryar da tu çîrokeka kesekî/ê wek podcast amade bikî, çîrok bi xwe dê te peyda bike. Ya girîng ew e tu vê yekê bikî mexseda xwe. Li bendê nemînin ku xelk keda we bibîne. Hûn keda xwe nîşanî wan bidin.
Hatice Kamer
Murat Bayram pêşkêşkarîya atolyeyan kir û bername 3 rojan dewam kir.
Botan International çi dike?
Botan International sala 2020an li Gundikê Melî, li Şirnexê ava bûye û sala 2021ê ofîsa xwe ya Dîyarbekirê jî vekir.
Botan International di tarîxa dewleta Tirkîyeyê de bû dezgeha pêşîyê ya perwerdeya rojnamegerîya kurdî û 558 kes beşdarî perwerdeyên wê bûn. Wê bi hevkarîya Rojnamegerên Sînornenas (RSF) stûdyoyek û navendeka nûçeyan ji bo rojnamegeran çêkirin. Li wê derê di salekê da 450 vîdeo-bername û nûçe hatin çêkirin. Hê jî ew der ji bo hemî rojnamegeran vekirî ye û bêpere ye. Herdu dezgehan e-kitêba Rojnamegerîya Dîjîtal amade kir û weşand.
Botan Internationalê di dawîya 2022yan da botantimes.com çalak kir û sala 2023yê jî kovara nûçeyan ya bi navê Botan Timesê weşand.
