Li Misirê keştîya geştûguzarîyê noqî avê bûye: 4 kes mirine, 9 kes winda ne

Li gorî rayedarên Misirê, roja 26ê Çirîya paşiyê ya 2024ê, li peravên Deryaya Sor keştîya geştûguzarîyê "Sea Story" di encama pêleka mezin de noqî avê bûye. Di bûyerê de 4 kes mirine û 9 kes hîn winda ne.

31 kes hatine rizgarkirin

Walîyê Herêma Deryaya Sor, General Amr Hanafy ragihandiye ku 31 kes ji nav avê hatine derxistin. Di nav kesên rizgarkirî de geştîyarên biyanî û xebatkarên misirî hebûne.

Keştî di heft deqîqeyan de noq bûye

Keştî ji bajarê Marsa Alam derketibû û diçû Hurdagayê. Lê belê, di destpêka sibehê de rastî pêleka mezin hatiye û di nav heft deqîqeyan de noq bûye. Hin geştîyar di kabîneyên xwe de asê mane.

Di keştîyê de geştîyarên ji 12 welatan hebûne

Di keştîyê de 44 kes hebûne. Ji van 13 kes misirî û 31 kes ji welatên cida bûne. Di nav wan de geştîyarên ji Amerîka, Belçîka, Brîtanya, Çîn, Fînlanda, Almanya, Îrlanda, Polonya, Slovakya, Spanya û Swîsreyê hebûne.

Lêkolîn berdewam e

Rayedaran daye zanîn ku keştî di meha Adarê de kontrola ewlehîyê derbas kiriye û tu kêmasîyên teknîkî tune bûne. Lêkolîna li ser sedemên noqbûna keştîyê berdewam dike.

Çavkanî:

• Botan Times
• The New York Times
• EPA