Li Spanyayê ji ber lehîyê 150 kes mirine - Agahîyên nûhatî!

Rewşa dawîyê

Li Spanyayê ji ber lehîya herî mezin ya 50 salên dawîyê 158 kes mirine û gelek kes jî winda ne. Li herêma Valencîyayê ji ber barana zêde lehî rabûye û xesareka mezin çêbûye. Wezîra Berevanîyê Margarîta Roblesê daxuyandiye ku hejmara mirîyan dibe ku zêdetir bibe.

Serpêhatîya kesekê ji lehîyê

Diego Hernandezê 56 salî di rêya çûna cenazeyê dîya xwe de rastî lehîyê hatiye. Ew û jina xwe di nav lehîyê de asê mane û ji wesayîta xwe derketine. Jina wî xwe li ronahîyeka kolanê girtiye, lê Diego bi xwe ketiye nav avê. Piştî demekê ew li nav otobûseka asêmayî stirîye û di saet 4ê sibehê de hatiye rizgarkirin.

Bandora lehîyê li ser jiyanê

Li herêmên Valencîya û Katalonyayê rewşa awarte hatiye îlankirin.

Li gor rayedaran:

• Di nav çend saetan de qasî barana salekê barîye
• Elektrîk û telefonên gelek taxan qut bûne
• Li 12 bajaran ava vexwarinê qirêj bûye
• Gelek rê û pir têk çûne
• Sê xetên metroyê xerab bûne
• Rêya trênê ya bilez a ber bi Madrîdê ve dibe ku sê hefteyan girtî bimîne

Alîkarîya dewletê

Serokwezîr Pedro Sanchezî serdana herêmê kiriye û soza alîkarîyê daye. Rayedarên herêmî daxuyandiye ku dê ji bo her malbata zirarketî herî kêm 6 hezar Euro (nêzî 6 hezar û 500 dolar) bê dayîn. Bi tevahî 250 milyon Euro ji bo alîkarîyê hatiye veqetandin.

Karên rizgarkirinê

• Yekîneyên leşkerî yên dema awarte dest bi xebatê kirine
• Parêzvanên sivîl û polîs beşdarî xebatan bûne
• Qralê Spanyayê Felîpe yê VIem destûr daye ku Muhafizên Qralî beşdarî xebatên rizgarkirinê bibin
• Ji ber xeterîya dizîyê hêzên ewlehîyê li herêmê ne
• 39 kes ji ber dizîyê hatine desteserkirin

Rewşa niho

Li herêmê hîn jî xeterîya baranê heye. Rayedaran daxwaz ji hemwelatîyan kirine ku di malên xwe de bimînin. Li gelek deveran karê lêgerîn û rizgarkirinê berdewam dike.

Çavkanî: Emma Bubola û José Bautista/New York Times, Botan Times 31ê Çirîya pêşîn 2024