Li Îsraîlê belge hatine dizîn, Netanyahu di bin gumanê de ye

Dadgerekî Îsraîlê îro derbarê dizîna belgeyên nehênî yên leşkerî agahîyên nû eşkere kiriye. Li gor agahîyan, alîkarekî Serokwezîr Benjamin Netanyahu ev belge dane medyayê.

Dadgehê dizî eşkere kir

Dadger Menahem Mizrahi di biryara xwe de gotiye ku Eliezer Feldstein, berdevkê buroya Netanyahu, belgeyên leşkerî yên nehênî dane rojnameya alman Bild. Ev yek di meha Îlonê ya sala 2024ê de pêk hatiye.

Armanc bandorkirina raya giştî bû

Li gor dadgehê, armanca dizîna belgeyan ew bûye ku raya giştî ya Îsraîlê li ser dîlên ku di destê Hemasê de ne, bê guhertin. Feldstein xwestiye ku guşara li ser Netanyahu ji bo girtina lihevhatinekê kêm bike.

Sê kes hatine desteser kirin

Di çarçoveya lêpirsînê de Feldstein û du leşkerên dî hatine desteser kirin. Navê leşkeran ji ber sedemên ewlehîyê nehatiye eşkere kirin. Hinek leşkerên dî jî di bin çavdêrîya malê de ne.

Buroya Netanyahu red dike

Buroya Netanyahu têkilîya xwe bi dizîna belgeyan re red kiriye. Lê belê, dadgehê dîyar kiriye ku belgeyên dizî di civîneka kabîneyê de ji alîyê Netanyahu ve jî hatine bikaranîn.

Çavkanî:

• Botan Times
• The New York Times
• Isabel Kershner