Wezîrê derve yê nû yê Sûrîyeyê hişyarî daye Îranê -Reuters

Li gor çavkanîyan, wezîrê derve yê nû yê Sûrîyeyê Esed Hesen El-Şîbanî hişyarîyek daye Îranê ku tevlî karên hundirîn ên Sûrîyeyê nebe. Wezîr di platforma X de daxuyanîyek belav kiriye û gotiye ku Îran divê rêzê li serwerîya Sûrîyeyê bigire.

Îranê çi gotibû?

Rêberê Îranê Ayetullah Elî Xamineyî di axaftineka televizyonî de gazî ciwanên Sûrîyeyê kiriye ku li dijî "plankerên tevlihevîyê" bisekinin. Xamineyî di axaftina xwe de gotiye ku ew li benda derketina "komeka xurt û birûmet" in.

Guherînên mezin li Sûrîyeyê

Di 8ê Kanûna pêşiyê ya 2024ê de piştî şerekê navxweyî yê 13 salan, çekdarên mixalif Beşar Esed ji desthilatdarîyê dûr xistine. Ev bûyer ji bo "Mehwera Berxwedanê" ya ku ji alîyê Îranê ve tê birêvebirin, wek derbeyeka mezin tê dîtin.

Îran çiqas alîkarî dabû Esedî?

Di dema şerî de Îranê bi milyon dolaran alîkarîya Esed kiriye û Pasdarên Şoreşê şandine Sûrîyeyê. Armanc ew bû ku Esed li ser desthilatdarîyê bimîne.

Çavkanî: Reuters

Botan Times