Kitêba 'Belongings' ya nivîskarên neteweyên bindest hate çapkirin

Kîtêba Belongings ya bi hevkariya 10 nivîskarên neteweyên bindest ên kurd û samî ve hatiye nivîsîn, ji aliyê Weşanxaneya Lîsê ve hatiye çapkirin.

Belongings antolojîyek e ku di encama serlêdanên dualî yên 5 nivîskarên Sámi û 5 nivîskarên Kurd de hat nivîsîn û ev serlêdan jî di çarçoveya hevkarîya du malên wêjeyê: Tjállegoahte- Författarcentrum a li Sápmiyê li bajarê Jåhkåmåhkke/Jokkmokk, Swêdê û Wêjegeh Amed a li Amed/Diyarbekir, Tirkiyê çêbûn.

Ev berhem pêhesînên wêjeyî pêşkêşî xwînerên sámîkî, kurdî û îngilîzî dike û li dor mijarên wekî welat, dîrok, çand û ziman; û her wisa rastî û sêwirînên du civakan bi rêya nivîsên afirîner ên li ser bingeha nîşeyên qadê dide kifşê.