Li ser lehîya Spanyayê em çi dizanin

Rewşa dawîyê

Li Spanyayê ji ber lehîya herî mezin ya çend dehsalên dawîyê 158 kes mirine. Li gor rayedaran di nav rojekê de barana çend mehan barîye û xisareka mezin li herêmê çêbûye.

Herêmên ziyanketî

Lehî bi taybetî li rojhilat û başûrê Spanyayê bandor kiriye. Li bajarê Valencîyayê û gundên wê zirareka mezin çêbûye. Li herêma Chîvayê di nav 8 saetan de qasî barana salekê barîye. Herwiha li herêma Endelusê jî, ku tê de bajarên Sevîlla û Malagayê hene, lehî rabûye.

Têkilîya bi guherîna îqlîmê re

Meteorologan dîyar kiriye ku sedema vê lehîyê "gota frîa" ye, yanê daketina hewaya sar. Ev bûyer dema ku hewaya sar li ser ava germ ya Deryaya Spî dikeve pêk tê. Zanyaran destnîşan kiriye ku germ bûna cîhanê bandorê li ser zêdebûna bahozên bi vî rengî dike. Di meha Tebaxê de li Deryaya Spî germahîya herî bilind a dîrokê hatiye tomarkirin.

Xisarên madî û bandora aborî

• 155 hezar mal bê elektrîk mane
• Gelek pir û rê têk çûne
• Gelek xanî bin avê de mane yan jî hilweşîyane
• Rêyên trênan zirar dîtine
• Li gor yekîtîya cotkarên Valencîyayê dibe ku bi hezaran hektar bexçeyên porteqalan zirar bibînin

Xebatên rizgarkirinê

• Zêdetirî hezar leşker hatine şandin
• Heya niho 158 kes mirine û hîn kes winda ne
• Xebatên lêgerînê berdewam dikin
• Ji ber pêşbînîya baranê ya nû xelk hatine hişyarkirin

Alîkarî û piştgirî

Dewletê daxuyandiye ku dê herêmên zirarketî werin pişgirîkirin û kesên zirarketî dê bên qerebûkirin. Heya niho bi sedan kes ji herêmên xeternak hatine veguhastin û bi hezaran kes di cihên ewle de hatine bicihkirin.

Çavkanî: Emma Bubola, Isabella Kwai û José Bautista/New York Times, Botan Times, Reuters, AFP, AP 31ê Çirîya pêşîn 2024