Weşanxaneya Darayê 'Çiyayê Girtî' çap kir

Weşanên Darayê berhema Çiyayê Girtî ya Îlhan Samî Çomak çap kir.

Çiyayê Girtî dîwaneka helbestan e ku Selîm Temo helbest ji defterên Îlhan Samîyî berhev kirine û edîtorîya kitêbê kirîye.

Helbestkar di kitêba xwe da 16 helbestên xwe pêşkêşî xwîneran dike. Kitêb ji du beşan (“Dorpêç” û “Bo te”) û 72 rûpelan pêk tê ku bergê wê ji alîyê Nazli Ongan ve hatîye çêkirin.

Ew di zîndanê da li ser kurdîya nivîskî xebitîye û wî helbestên xwe nivîsîne.

Îlhan Samî Çomak 8ê Adara 1978an li Kanîreşa Çewlîgê ji dayik bûye. Çomakî li Zanîngeha Stenbolê beşa Coxrafyayê qedandîye. Ew 1994an hatiye desteserkirin û girtin ku ev 29 sal in ew girtî ye. Wî bi tirkî û kurdî helbest nivîsîne. Çomakî çendîn kitêb nivîsîne û ew hêjayî wergirtina çend xelatan hatiye dîtin.

Beşek ji dîwana Îlhan Samî Çomak:

Min cureyek nû kifş kir, çarşem
Dengê çeman wenda bûye
Di xeyîdina keçxamayan de
Xwîna bêjeyên nûzayî ziwa bûye
Li ser lêva min
Pençe û qîlên valahîyê razên min perçe dikin
Qîrîna min olana çîyan li hevalan dixe
Ez ê dengê bilûra xwe bidim devê bilbilan
Û di qelşên latên enîya xwe de
Sosinan avdim