Li Batmanê bi minasebeta 21ê Sibatê panelek hat lidarxistin

Li Batmanê, bi minasebeta 21ê Sibatê Roja Zimanê Zikmakî Ya Cîhanî panelek hate lidarxistin.

Panela bi navê “Statû û Perwerdehîya Bi Zimanê Kurdî” li Salona Prz. Tahîr Elçî ya Baroya Batmanê di 13.30an da dest pê kir û di 15.30an da bi dawî bû. Panel bi hevkarîya Şaxa Batmanê ya Komeleya Nûbiharê, Şaxa Batmanê ya Egîtîm-Senê, ARÎ-DER û Komeleya Ehmedê Xanê hate lidarxistin.

Moderator Nuh Bozkur behsa dîroka 21ê Sibatê kir ku çawa bûye Roja Zimanê Dayîkê Ya Cîhanî û panelîst bi beşdaran dane nasîn.

Lêkoler û zimanzan Resûl Geyîk di bernameyê da behsa proseya derketina kovara Hawarê, cihê kovara Hawarê li ser ronakbîrîya kurdan û rê û metodên ku ji bo xilaskirina zimanan hatine tetbîqkirin, guherîna alfabeya kurdî, muhîmîya muhafezekirina zimanê zikmakî, cihê tercime û kulturê ya di parastina zimanê zikmakî da kir.

Panelîst Fatma Budak Guler behsa mijara Jin û Ziman, rola jinan ya di hînkirina zimanê dayîkê da herwiha muhîmîya perwerdehîya bi zimanê zikmakî ya li ser geşedana zarokan û ji alîyê psîkolojîk ve muhîmîya zimanê zikmakî kir.

Panelîst Mela Silêman Kurşun behsa zimanê dayîkê yê di çavkanîyên dînî da û nêrînên Îslamî ya li ser parastina zimanê dayîkê, cihê medreseyên kurdan yê di muhafezekirina zimanî da û rola pêşketin û muhîmîya berhemên klasîk a di parastina zimanê kurdî da kir.

Di panelê da li ser hindê hat sekinîn ku zimanê kurdî bibe zimanê fermî û yê perwerdehîyê. Di dawîya panelê da ji beşdaran çend pirs hatin girtin û ji alîyê panelîstan ve hatin besivdayîn.